Reclamámoslle á Xunta a licitación do novo centro de saúde de Noia

por Administrador · 04 de xuño de 2026

O alcalde, Francisco Pérez Caamaño, lembra que a licitación das obras do novo centro de saúde de Noia, con máis de 10 millóns de euros de investimento previsto, segue pendente da Consellería de Sanidade.

O novo centro de saúde de Noia, un dos proxectos máis agardados no municipio, segue sen data para o inicio das obras. O noso alcalde, Francisco Pérez Caamaño, lembrou que o Concello continúa á espera de que a Consellería de Sanidade saque a licitación a actuación, e subliñou que "o seu avance non depende da administración local", situando a responsabilidade do calendario onde corresponde: na Xunta de Galicia.

As cifras do proxecto dan idea da súa importancia. A Xunta adxudicou en marzo de 2025, por 310.365 euros, a redacción do proxecto básico e de execución e a dirección de obra. O futuro centro suporá un investimento total de máis de 10 millóns de euros, cunha superficie construída superior aos 3.300 metros cadrados, 21 consultas, Punto de Atención Continuada (PAC) e base do 061, e dará servizo á veciñanza de Noia, Lousame, Outes e Porto do Son.

Máis dun ano despois daquela adxudicación, a licitación da obra segue pendente. Desde o PSdeG-PSOE de Noia instamos á Consellería de Sanidade a non demorar máis un equipamento imprescindible para a sanidade pública de toda a comarca: cada mes de atraso sófreno as e os pacientes da área á que dará servizo.

O goberno municipal que encabeza o noso alcalde seguirá reclamando dilixencia á Xunta para que o compromiso co novo centro de saúde se traduza canto antes en obras.

Fontes: Canal Barbanza - El Correo Gallego

Comparte