Noia porá fin ás verteduras fecais á ría en setembro

por Administrador · 16 de xuño de 2026

O goberno local que encabeza o alcalde socialista Francisco Pérez avanza na reparación dos bombeos do saneamento —14 non funcionaban correctamente— e prevé que en setembro de 2026 cesen as verteduras á ría, logo de dous anos de augas sen depurar.

O goberno local que encabeza o noso alcalde, Francisco Pérez, avanza a bo ritmo na reparación do saneamento municipal, unha rede que atopamos en estado crítico: 14 bombeos non funcionaban correctamente e Noia levaba dous anos vertendo augas fecais sen depurar á ría, coa depuradora precintada desde novembro de 2024. O obxectivo xa ten data: en setembro de 2026 cesarán definitivamente as verteduras.

O traballo nótase bombeo a bombeo. O de Río do Porto xa está renovado e nestes momentos actúase nos de Peirao do Marqués e A Chaínza, logo das melloras executadas na Barquiña, na Albariza, en San Lázaro e no paseo marítimo. Ademais, a reparación do pozo de Barro xa está licitada cun investimento de 33.950 euros e tamén se atopa en licitación a obra do bombeo do Floro.

A peza clave é a depuradora, renovada por Augas de Galicia con 3 millóns de euros. Aínda que debía estar lista en xuño, entrará en funcionamento en setembro, unha vez superadas as probas. Como explicou o alcalde, acompañado do tenente de alcalde Manuel Seijas, estamos a facer «un forte investimento en materia de saneamento para reverter unha situación moi complicada».

Desde que asumimos o goberno tras a moción de censura de agosto de 2025, xunto aos nosos socios de coalición, recuperar a ría e poñer orde no saneamento foi unha prioridade absoluta. Setembro marcará un antes e un despois para Noia: unha ría sen verteduras é saúde, é marisqueo e é futuro.

Fonte: El Correo Gallego

Comparte